SUMUR SAKTI

Ngigou Series

BUKAN SULAP TAPI SIHIR

(Sumur Sakti New Version)

Tebayaknya drama di tayangan parabola merebakkan racun ke peminat-peminatnya. Apa agik drama nang baru di siaran SCTP nang pala namanya Ganteng Gantung Seringgila. Gasaknya peminatnya dari mula nang ceremut sampai ke nang keriput. Begeyalah kejadian kepada empat urang sekawan nang udahan jadi nenek tua tapi lanjitnya tak ilang-ilang.

Meliatik pemain drama nang lecuh-lecuh menimbulkan urat birah nenek tua iya, sumangannya ngelenyar tak semengah mun dah mula drama iya di siarkan. Mun padam listrik tahan membeli batu batrai ABC dua kotak tenat, gara dapat nonton.

Di suatu malam, salah sorang nenek iya betanya ke kawan sehati empedu ayamnya. 

“tak ka cerat nak muda agik, macam gik dulu?” 

nang lain nyaut. “mun bisa waktu di putar, asanak muda tak taim-taim”.

 “yalah, pa akal tak bisamuda agik” jinya nang lain agik. 

Tak lama lekak iya salah sorang ngomong “nengar-nengar berita radio, jinya orang ada telaga sakti nang bisa makbulkan kemauan sumangan urang”. 

“tak taulah inyan ka bula-bula berita iya” jinya agik. 

Nang lain lansung nyaut “bisa wa kita cobakan ke sia, entahnya inyan. Bisalah kita jadi lecuh agik”.

 “mun giya isuk kita pugakan ke sia” jinya nek tua nang madahkan berita radio iya.

Empat urang nenek tua iya pun sampai ke telaga sakti iya lekak melintasi perjalanan nang jauh, merang parit kaba, melangkah telaga kaba, sampai melangkah telaga mera’an. Begiya sampai di liatiknya tulisan-tulisan di papan jamban telaga sakti nang carakan besar iya. Tulisan nang ada gasaknya buku panduan cara nak minta sesuatu di telaga sakti.

Empat nenek iya rata tak sabar nak nyobakan ke makbulan telaga sakti nang kerap ada di perama nang dilekatkan di warung-warung, tiang anim, batang kayu, di  rumah temawang pun ada.

Nenek kesatu pun mula terejun ke telaga sambilan begantil ke kayu ara ngerauk kepedau. 

“Aku nak macam Julia Persik”.

 Nenek iya pun tengelam ditengah telaga, ngerubuk-ngerubuk. Nang lain cemas menyangka kawannya mati. Di kiraan ke tujuh nenek iya timbul, nang tadi keriput penuh ubanan rambutnya jadi mencar-mencar macam nak Julia Persik. 

Kawannya nang lain berebut nak terejun, tapi menurut panduan tak bisa giya harus sengantik. Caranya pakai osom. Lekak osom dapatlah undian sapa nang terejun lekak iya.

Nenek kedua besemangat terejun ke telaga. 

“Aku nak macam artis India”. 

Begiya timbul jadilah artis india inyan. Idung mancung, pusat tejumbul.

Nenek ketiga ngelenyar meliatik kawannya nang rata jadi muda agik. Lansung bececak asal rudu tak meleda ada tunggul dilanggarnya sampai latah.

 “ee.eee.eee… Apam jombol, Apam jombol, Apam jombol”. 

Lansung temasuk ke telaga, begiya timbul… carakan jombol jadiannya.

Meliatik tragedi di depan bigik matanya. Nenek keempat nak bececak karna ketakutan. Tapi baru nak tiga jangkaan lentar pun memanah sumangannya nang ada di sia. Menurut panduan, tak boleh mundur lebih tiga jangkaan, mun ndak iya di panah lentar.

Tiga nenek tua nang ada di darat iya besusun tumpa tiga jadi apam pulau pinang lekak di panah lentar.

Di iris belah tiga, di masukan ke pelastik assoy. Raganya tiga apam lima ribu di pasar simpang empat bulan puasa taun ituk.

Begeyalah nasib saya nang masih bujangan ni. Tak ada nak buatkan kuih tambul-tambul tuk kan buka puasa dirumah. Mau tak mau beli di pasar, ke’atinya lah banyak pakai serigula. Namakan tak tau buat sorang. Sore bahari ituk makan apam sajalah, isuk baru kelepon, lusa ukal inti, tulat bingka, janu liat duitnya masih atau ka abis.

Cerita nenek tua tadi usah di aci.

Selamat berpuasa dari Cek Mat Adventures